2019-cü ildən 2022-ci ilə kimi Bakının “Neftçi” klubunun şərəfini qorumuş Mamadou Mbodj Qazaxıstan mətbuatuna müsahibə verib. Hal hazırda Vyetnamın “Thanh Hoa” klubunda çıxış edən seneqallı futbolçu müsahibədə Azərbaycandakı karyerası barədə də danışıb və “Qarabağ” klubunu “Kayrat” klubu ilə müqayisə edib.

— Biz tez-tez Qazaxıstan və Azərbaycan klublarını müqayisə edirik. Niyə “Qarabağ” Çempionlar Liqasında “Kayrat”dan daha yaxşı çıxış edir?

— Təcrübə əsasdır. Baxın, “Qarabağ” hər il Avropa yarışlarına çıxır. Bu tip turnirlərdə ardıcıl beş il oynamaq bir şeydir, beş ildən bir oynamaq isə tamamilə başqa bir şeydir. Amma heç bir komanda bu ilki uğuru növbəti on ildə təkrarlaya bilməz. “Kayrat” klubuyla birlikdə onlar daha da irəli gediblər.

Mənə Azərbaycanlıların stabilliyi xoş gəlir. “Qarabağ” klubuna qarşı neçə dəfə oynasam da, həmişə onların məşqçisi və əsas heyəti eyni idi. Hər il rəhbərlik bir neçə oyunçu transfer edir, amma adətən formalaşmış, yaxşı qurulmuş sabit heyətə malikdilər.

— 2020/21 mövsümündə dramatik bir oyun keçirdiniz, elə deyilmi?

— Çempionatın son turunda “Neftçi” klubu “Qarabağ” ilə qarşılaşdı. Çempionluğu təmin etmək üçün onlara cəmi bir xal, bizə isə üç xal lazım idi. 90-cı dəqiqədə çempionluğu təmin edən yeganə qolu biz vurduq.

Düzünü desəm, əlavə vaxtda rəqibimiz qapımıza möhtəşəm mövqedən qol vurmalı və hətta qapımıza penalti təyin edilməli idi, amma xoşbəxtlikdən hakim buna reaksiya vermədi (gülür). Ona görə də, “Qarabağ” klubunun nə qədər güclü komanda olduğunu yaxşı bilirəm.

Qeyd edək ki, Mamadou Mbodj 2019-cü ildə Litvanın “Jalgirs” klubundan “Neftçi” klubuna keçib. 3 il müddətində ölkəmizdə oynayan futbolçu ölkə çempionatında 71 oyunda meydana çıxaraq 7 qol vurub. Futbolçu 2023-cü ildə Qazaxıstanın “Ordabası” klubuna keçib.