Almaniyanın “Ayntraxt” klubu 2025/26-cı il mövsümü UEFA Çempionlar Liqasının pley-off mərhələsinə vəsiqə qazanmaq üçün nəzəri şansını itirib.

Almanları turnirdən uzaqlaşdıran təmsilçimiz “Qarabağ” klubu olub. Belə ki, Çempionlar Liqasının Liqa mərhələsinin 7-ci turunda “Qarabağ”a uduzduqdan sonra almanlar bütün şanslarını itiriblər.

Komandalar arasında oyun Tofiq Bəhramov stadionunda baş tutub. Oyunu Sandro Şerer (Büttikon, İsveçrə) idarə edib. Təmsilçimiz oyunda 3-2 hesabı ilə qalib gəlib. Oyunun ən yaxşı oyunçusu isə, ağdamlıların hücumçusu Kamilo Duran seçilib. Futbolçu bu oyunda iki qol vurub.

Liqa mərhələsinin bitməsinə bir oyun qalmış “Ayntraxt” yeddi oyundan dörd xalla turnir cədvəlində 33-cü yerdədir. Onlar hazırda 24-cü yerdən dörd xal geridədirlər. Nəzəri olaraq növbəti oyunda qələbə qazansalar belə, bu qələbə onlara kömək etməyəcək.

Qeyd edək ki, daha əvvəl Qazaxıstanın “Kayrat” və İspaniyanın “Vilyarreal” komandaları pley-offa vəsiqə qazanmaq şanslarını itirmişdilər.