“Qarabağ”ın baş məşqçisi Qurban Qurbanov komandasının Çempionlar Liqasının Liqa mərhələsinin 7-ci turunda “Ayntraxt”a qarşı (3:2) qələbəsindən danışıb.

“Azarkeşlərimizi təbrik etmək istəyirəm. Onlar həqiqətən də bu qələbəyə layiq idilər. Hər matçda bizimlə idilər. Bəlkə də bu qələbəni bizdən daha çox istəyən azarkeşlərimiz var. Onların duaları bizə böyük uğur gətirdi. Oyunçularımızı təbrik edirəm. Onlar möhtəşəm iş gördülər. Bu qələbəni qazanmaq üçün onlar təkcə istək və aqressivlik deyil, həm də intizam nümayiş etdirdilər. Əvvəlki Çempionlar Liqasının bəzi oyunlarında çatışmayan bu intizam idi. Komandanın bu intizamı sona qədər necə qoruduğunu və qələbəyə inandığını gördük. Biz oyunçular, azarkeşlər və bütün Azərbaycan futbolu çox xoşbəxtdir.

Möcüzə? Mən qələbələrə inanıram. Bunu beynəlxalq təcrübədə görmüşük. Zəif hesab edilən komandalar böyük klubları məğlub etdi. Ümumiyyətlə, mən belə şeylərə inanıram.

Başqa bir yoldaşlıq oyunu keçirsəydik, komanda daha yaxşı vəziyyətdə olardı. Vaxtımız az idi. Amma güclü tərəflərimizi maksimum dərəcədə artırmağa çalışdıq. Rəqibimizə əsasən bir neçə kiçik düzəliş etdik. Xoşbəxtlikdən, hər şey yaxşı alındı. Komanda yaxşı hazırlaşdı. Qələbə möhtəşəm idi, hər üç qol möhtəşəm idi. Amma xüsusilə məmnunam ki, buna yaxşı oyun və keyfiyyətli hücumlarla nail olduq. Oynamağa çalışdıq. Daha sadə, daha sərbəst, daha inamlı və daha cəsarətli. “Ayaks”la oyundan sonra oyunçular çox məyus oldular. Biz bunu geridə qoyduq və fürsətimizdən maksimum dərəcədə istifadə etmək barədə danışdıq. Oyunumuzun keyfiyyətini daha da yaxşılaşdırdığımıza görə şadam

Hakimlərin işi? Düşünürəm ki, əlavə şərhə ehtiyac yoxdur. Mən də sizin kimi həmin penaltiyə görə əsəbiləşdim, amma tez özümü ələ aldım (gülür). Bu normaldır, futbolda belə hallar olur. Prezident özü artıq çox ətraflı, əhatəli və dəqiq cavab verib. Ona bir daha təşəkkür edirəm.”

“Qarabağ” hazırda Çempionlar Liqasında 10 xalla 18-ci yerdədir. “Ayntraxt Frankfurt”un cəmi dörd xalı var və Çempionlar Liqasının pley-off mərhələsinə çıxmaq şansını itirib.