UEFA Çempionlar Liqasının yeddinci turunda Almaniyanın “Ayntraxt” klubu ilə qarşılaşan “Qarabağ” 3-2 hesabı ilə qələbə qazandı. “Qarabağ”ın bu qələbəsində diqqət çəkən çoxlu məqamlar oldu. Bunlardan biri də, oyunun start fiti zamanı “Qarabağ” azarkeşlərinin yaratdığı xoreoqrafiya oldu.

“İmarət Tayfa” azarkeş qrupunun yaratdığı bu gözəl xoreoqrafiya, sanki “Qarabağ”ın möhtəşəm qələbəsinin başlanğıcı oldu. Xoreoqrafiyada klubun məşqçisi Qurban Qurbanov, komandanın heyəti və çox təsir edici “Our faith is greater than your budget” yazısı əks olunmuşdu. Azarkeşlərin “Bizim inamımız büdcənizdən daha böyükdür” şüarı ilə başlayan oyun, “Qarabağ”ın əzmkar qələbəsi ilə bitdi. Bununla da onlar birlikdə, dünyaya, “Qarabağ” ruhunun nə olduğunu göstərdilər. Bu artıq “Qarabağ”ın adi bir futbol klubundan çox böyük olmasının göstəricisi idi.

Azarkeşlər “Qarabağ”ın Çempionlar Liqasının əsas mərhələsinə ilk dəfə vəsiqə qazandığı heyətin oyunçularını da unutmamışdılar. Xoreoqrafiyanın bir tərəfində komandanın 2017/18 mövsümündəki oyunçuları, digər tərəfində isə, 2025/26 mövsümünün oyunçularının rəsmi yer almışdı.

Yəqin ki, əksər azarkeşlərə bu xoreoqrafiyanın necə ərsəyə gəlməsi maraqlıdır. Bu xoreoqrafiyanın necə hazırlanması barədə bəzi məlumatlar əldə etmişik.

Əldə etdyimiz məlumata görə, bu xoreoqrafiyanın yaranması ideyası “Ayaks”la oyundan bir neçə gün əvvəl yaranıb. Sadəcə resurs azlığı səbəbindən azarkeş qrupu bunu növbəti oyuna planlaşdırıb. İlk əvvəl xoreoqrafiyanın dizaynında “Our faith is greater than your budget” yazısı, şahmat fiqurları və Qurban Qurbanovun rəsmi olması planlaşdırılıb. Ancaq sonradan qrup üzvləri xoreoqrafiyanı bir qədər böyütmək qərarına gəliblər. Bu zaman xoreoqrafiyaya futbolçuların rəsmlərini də əlavə ediblər. Azarkeş qrupunun məqsədi, “Qarabağa” dəstək olmaq və az büdcəli bir klubun inam ilə böyük nəticələr qazana biləcəyi mesajını dünyaya çatdırmaq olub.

Xoreoqrafiya, heç bir çap və basqı aləti olmadan, tamamilə əl ilə hazırlanıb. Rəsmlərin çəkilməsi və digər işlər təxminən 20 gün çəkib və azarkeş qrupunun 80 nəfərə yaxın üzvü bu işdə zəhmət çəkib. Əldə etdiyimiz məlumata görə bu işin ərsəyə gəlməsində təxminən 5 000 manatdan çox pul xərclənib. Bütün bu vəsaiti qrupun indiki aktiv üzvləri və “İmarət”in keçmiş üzvləri qarşılayıb. Həmçinin əldə etdiyimiz məlumata görə, “İmarət” növbəti oyunlarda da, maraqlı xoreoqrafiyalar planlaşdırırlar.

Qeyd edək ki, 2009-cü ildən fəaliyyət göstərən “İmarət” ölkənin ən böyük azarkeş qrupu hesab edilir. Adını “Qarabağ”ın stadionu olan “İmarət Satdionu”ndan alan azarkeş qrupunun ölkə xaricində də bir neçə qolu var. Onlar “Qarabağ”ı həm ölkə çempionatında həm də ki, avrokuboklarda dəstəkləyirlər.

Sonda saytımız adından “İmarət Tayfa”ya təşəkkür edirik. Onların bu xoreoqrafiyası və “Qarabağ”ın əzmkar qələbəsi həm də dünyaya Azərbaycanın gücünü göstərdi. Bu, həm də Azərbaycanın Qarabağı azad etməsi və son illərdə siyasi masalarda olan hegemonluğunun məntiqi davamı idi.