Populizmin bütləşdirdiyi və ya hər uğursuzluğa qurban gedən məşqçi.

Bir həftədir Qurban Qurbanov yenə bütləşdirilib. Axşam “Qarabağ” uğursuz olsa, bütləşdirilən şəxsin daşlanması prosesi başlayacaq. Yəqin ki, Qurban müəllim psixoloji olaraq bütün ssenarilərə hazırdır. Ən azından təcrübəsi, səbri və Qurban Qurbanov böyüklüyü buna imkan verir.

Bəs azarkeşlər hadisələrə pafossuz baxmağı, tərifin və tənqidin dozasını müəyyən etməyi nə zaman öyrənəcək? Qurban Qurbanov mənə görə “Qarabağ”ı çıxandan sonra yerdə qalan Azərbaycan futbolundan böyükdür. Amma ideal deyil. Məsələn, “Qarabağ”ın son Liqa oyununda “Kəpəz”ə məğlub olmasının səbəbkarı “Qarabağ”ın məşqçisi idi.

Daha doğrusu fikrimcə, bu, Ağdamlıların məşqçisinin “Kəpəz”ə hədiyyəsi idi. Qurbanovun birdən-birə heyətdə bu qədər rotasiya etməsi məntiqə uyğun deyildi. Həm də əlində daha yaxşı rotasiya imkanı ola-ola belə addım atması suallar yaradırdı. Ya cənab Qurbanov “Kəpəz”ə çox yuxarıdan aşağı baxırdı. Ya da ki, “Kəpəz”ə 3 xal hədiyyə etmək istəyirdi. Sadəcə kimlərsə, ölkə tarixinin bu günə qədər olan ən vacib oyunundan əvvəl əlavə təzyiq yaratmamaq üçün, kimlərsə də münasibətləri pozmamaq üçün susdu.

Axşamkı oyunda hansı nəticə olmasından asılı olmayaraq, Qurbanov Azərbaycan tarixinin ən yaxşı məşqçisidir. Amma Qurban müəllim və digərləri gəldi gedərdi, vacib olan “Qarabağ” klubudur. Uğurlar “Qarabağ” və “Qarabağ”ın Qurbanovu!