Azərbaycan klublarının UEFA Çempionlar Liqasında vurduğu qolların ümumi sayı 150-yə çatıb. Yubiley qolunu Bəhlul Mustafazadə vurub. Bu barədə “PFL”in rəsmi saytı məlumat yayıb.

“Qarabağ”ın müdafiəçisi Liqa mərhələsinin VII turunun “Ayntraxt”la ev matçında qələbə topunun müəllifi olub. Futbolçu oyunun son dəqiqəsində qol vuraraq hesabı 3:2 edib. Bu qol, klublarımızın Çempionlar Liqasın təsnifat və əsas mərhələlərinə keçirilən 116-cı matçda 150-ci qolu olub.

Bu qollara 7 komanda imza atıb. “Qarabağ” hamıdan çox, 110 dəfə fərqlənib. “Neftçi” 18, “Bakı” 7, “Şəmkir” 6, “Kəpəz” 4, “Şamaxı” 3, “Xəzər Lənkəran” 2 qola sevinib. 150 qoldan 135-i təsnifat və pley-off, 15-i əsas mərhələlərdə (qrup və liqa) vurulub.

Qeyd edək ki, Çempionlar Liqasında Azərbaycan təmsilçilərinin ilk qoluna İmamyar Süleymanov imza atıb. O, 1998-ci il iyulun 22-də LKS (Polşa) – “Kəpəz” qarşılaşmasında (4:1) fərqlənib.