Ağdamın “Qarabağ” klubu qışda böyük transfer əməliyyatı planlaşdırır. Transferlər içərisində sürpriz adlar da ola bilər.

Əldə etdiyimiz məlumata görə, Ağdamın “Qarabağ” klubu qış transfer pəncərəsində azı 3 yeni transfer etməyi planlaşdırır. Ölkəmizin Avrokuboklardakı ən uğurlu təmsilçisi olan “Qarabağ” klubu, uğurlarını daha da artırmaq üçün heyətdə bəzi dəyişikliklər edəcək. Aldığımız məlumata görə Qurban Qurbanov həm bu mövsüm Çempionlar Liqasında uğurlu çıxışa davam etmək, həm də yeni mövsüm üçün transfer işlərinə qışdan başlamaq istəyir. Klubun əsas oyunçularından olan Kadinin zədələnməsi, orta xəttin əsas oyunçusu Yankoviçin zədədən sonra əvvəlki formasından uzaq olması, həmçinin yayda komandaya qoşulan Semi Mmaenin tələb olunan performansı göstərməməsi Qurban Qurbanovun komandaya “əl gəzdirmək” istəməsinə səbəb olub. Təcrübəli mütəxəssis müdafiə, yarımmüdafiə və hücüm mövqeyinin hər birinə azı bir oyunçu transfer etmək istəyir. Klub həmçinin bir neçə mövqedə oynaya biləcək bir unversal oyunçu da axtarır.

“Qarabağ”ın Çempionlar Liqasında çox uğurlu oynamasından sonra, əksər oyunçuların xarici klubların “radar”ına düşməsini də nəzərə alsaq, klubun qışda transfer bazarında fəal olmasını gözləyə bilərik.

Klub noyabr ayından bir neçə oyunçu ilə danışıqlara başlayıb. Adətən tanınmayan və tam hazır olmayan oyunçuları transfer edən “Qarabağ”, bu dəfə hazır formada olan və kluba çox güc qatacaq bir oyunçunun transferinə hazırlaşır. Klubun transfer əməliyyatına mane ola biləcəyini nəzərə alaraq, transferlər rəsmi təsdiqini tapmamış, danışıq aparılan oyunçular barədə hələlik heç bir məlumat verməyəcəyik. Ancaq “Qarabağ”ın 3 ildir izlədiyi və ən azı yaya kimi transfer etmək istədiyi bir oyunçu barədə tezliklə saytımızda məlumat olacaq.