“Qarabağ” niyə “Ayaks”a uduzdu?

Azərbaycan futbolunun ən böyük klubu və Azərbaycan futbolunun uğurlarının ən azı 90 faizinin altında imzası olan “Qarabağ”, 10 dekabrda UEFA Çempionlar Liqasının Liqa mərhələsində “Ayaks”a məğlub oldu. Hər bir azərbaycanlı kimi bu məğlubiyyətə mən də pis oldum. Amma mənə bu məğlubiyətdən də çox pis təsir edən, ölkədə bir kütlənin “Qarabağ” və Nəriman Axundzadənin üstünə getməsi oldu.

Bu mənzərəni görəndə istər istəməz 15 il əvvələ qədər ölkə klublarının Avropada necə qapazaltı olmasını xatırladım. Qeyri-ixtiyari beynimdə belə bir sual yarandı, nə tez böyüdünüz ə? “Qarabağ”ın “Ayaks”ı udmasını gözləyirdiniz? Hansı məntiqlə? Başa düşürəm ki, bu ölkədə futbol biliyi heç idman jurnalistlərində yoxdur, azarkeşində hardan olsun? Amma Azərbaycan və Niderland futbolu arasındakı fərqi dərk etmək bu qədər çətindir? Niderland futbolunda olan tempdən xəbəriniz var? “Qarabağ”ın ilə 300-500 min alan oyunçularının mövsüm ərzində 20 oyunda yüksək tempdə oynamaq bacarıqları olsaydı, onlar, indi 5-10 milyon maaşa İngiltərə Liqasında oynayardı. Bunların mövsüm ərzində yüksək tempdə oynaya biləcəyi 5-6 oyun var.

Başa düşürəm ki, “Qarabağ”ın topladığı 7 xal eyforiya yaradıb və “Ayaks”ın yerində “Real Madrid” olsa da “Qarabağ”ın qələbəsini istəyəcəkdiniz, amma “Qarabağ”ı Çempionlar Liqasının Liqa mərhələsinə aparan Nərimandan nə istəyirsiniz? Əgər bu gün “Qarabağ” Çempionlar Liqasının Liqa mərhələsindədirsə, bu həm də Nərimanın əməyinin nəticəsidir. “Qarabağ”ın Çempionlar Liqasının play-off mərhələsində “Ferentsvaroş”u keçməsi, məhz Nərimanın ustalığının nəticəsi idi.

Əgər “Ayaks”la oyunda oyunçuların performans parametrlərinə baxsanız, bu oyunda da Nərimanın ən yaxşılardan biri olduğunu görərsiniz. Maraq üçün, 3 əsas parametr üzrə, Nərimanın Kamilo Duran və Leandro Andrade ilə dünənki oyunda olan statistikasını müqayisə edim, baxın.